Ni eskolan

Aurkezten dizuedan marrazkia, nire 4-5 urteko gela erdia da. Nire intentzioa, gela osoa marraztea zen, baina ez nekienez nola marraztu, gela erdia marraztu dut. Egia esan, oso ondo gogoratzen dut nire 5 urteko gela.

Ikusten duzuen bezala, nire gela, txokoetan banatuta zegoen. Marrazkian, etxetxo txokoa eta inprenta txokoa marraztu dut. Etxetxo txokoan, ikusten duzuen bezala, ohea, platerak, edalontziak,… zeuden eta  bertan, jolas sinbolikoa lantzen zen. Etxetxo txokoaren ondoan marraztu dudana, inprenta txokoa da eta bertan, idazten eta irakurtzen  ikasten genuen. Lehen aipatu dudan bezala, gela, txoko ezberdinez antolatuta zegoen. Beste txokoak honako hauek ziren; denda txokoa, antzerki txokoa eta marrazketa txokoa. Antzerki txokoan, antzerkiak egiten genituen, eta horretarako, eszenatoki dotore bat geneukan gelan. Oroitzen dut, oso ondo prestatzen genituela egin beharreko antzerkiak, ensaiatu egiten genuen eta  gero, gure ikaskideei aurkezten genien. Egia esan, txoko honek esfortzua exijitzen zuen. Gogoratzen dut, antzerki batean sorginez mozorrotu nintzela, mozorrotzeko ere baikeneukan.  Oso lan politak egiten genituen.  Antzerkiak aurkezteko garaian, lurrean zegoen marra batean esertzen ginen eta adi-adi begiratu eta entzuten genuen gure ikaskideen antzerkia. Lehen aipatu dudan eszenatokian, antzerkiak egiteaz gain, irakasleak, ipuin ezberdinak kontatzen zizkigun.  Denda txokoan, matematika lantzen genuen. Txoko hau zen gutxien gustatzen zitzaidana. Dendako lana, etxetik etortzen zirenei gauzak saltzea zen. Gezurretako dirua erabiltzen genuen, eta horrekin, gauzak erosteko aukera egoten zen. Azkeneko txokoa, marrazketa txokoa da eta bertan, marrazki ezberdinak egiten genituen, bai margoekin,  bai pintzelekin,… oso politak ateratzen ziren.  

Ni, etxetxo txokoan marraztu naiz, gehien gustatzen zitzaidan txokoa baitzen. Oso ondo pasatzen genuen bertan. Txoko honetan zegoen ia guztia egitazkoa zen. Gehienetan, aita eta ametara jolasten genuen eta normalean, denok nahi izaten genuen ama izan, orduan hor hasten zen iskanbila, baina irakasleak segituan konpontzen zuen.

Txokoetan banatzeko garaian, taldeak antolaturik zeuden eta talde bakoitza, animali bat zen. Txoko bakoitzean, animaliaren kartela zegoen, eta orduan, guk bagenekien zein txokoetan egon behar ginen.

Ez dakit ohartu zareten, baina inprimategi txokoan irakaslea marraztu dut. Irakasleak Rosi zuen izena eta oso atsegina zen.  Rosi, txoko guztietatik pasatzen zen eta denei laguntzeko prest egoten zen. Normalean, eta denbora gehien egoten zen tokia, inprenta txokoan zen, esan dudan bezala, bertan ikasten baikenuen idazten eta irakurtzen, baina edozer behar bazenu, irakaslea segituan joaten zen laguntzera. Egia esan, oso oroitzapen ona dut irakasle honetaz.

Orain nagoen ikastolan, Jakintza ikastolan, ez dute txokoen bidez ikasten, bertan, Urtxintxa proiektua erabiltzen baitute eta nire lehengo ikastetxean, Urdaneta ikastetxean, Amara Berri sistema erabiltzen dute. Orain, sistema berri bat ikusi eta ikasteko aukera dut, eta oso baliagarria suertatuko zait.

Hau izan da nire marrazkiaren azalpena, espero dut zuen gustokoa izatea.

Besterik gabe.

Jakintza ikastola

Jakintza, Ordizian kokatuta dagoen ikastola da.  2 urtetik, 18 urte bitartera ikas daiteke bertan. Bi eraikin ditu, bata, 2 urtetik 5 urte bitartekoentzat da:

                                        

  bestea, 6 urtetik 18 urte bitartekoentzat:

Ikastola honek, hainbat zerbitzu eskaintzen ditu:

1.      Jangela

Ikastolako jangela zabalik dago ikastolako ikasle eta irakasleentzat ikasturte osoan zehar. Bertan zerbitzatzen den bazkaria sukaldariek ikastolako sukaldean prestatzen dute egunero.

2.      Haurtzaindegia

Haurtzaindegia ere eskaintzen da eta ondorengo hau da beren ordutegia:  goizeko 7 etatik  9 etara. Arratsaldean, 4.30 etatik 6 etara.

3.      Garraioa

Autobusa ere eskaintzen dute. Goizean, eguerdian eta  arratsaldean eskaintzen da.

Haur hezkuntzan, Urtxintxa proiektua erabiltzen dute.  Urtxintxa proiektuaren ezaugarriak honako hauek dira:

·         Haurra bere osotasunean hartzen duen proiektua

·         Euskal Herri osorako egina

·         Diseinu bateratua eta eraginkorra

Urtxintxa proiektuari buruz hizketan jarraituko dut eta erabiltzen duten materiala ere erakusten joango naiz.

Jakintza ikastolak, aurkezpen bideo bat egin zuen eta honako hau da:

Eskolako une onak eta txarrak

Pentsatzen eta pentsatzen egon, baina ez naiz eskola garaiko oroitzapen askotaz gogoratzen eta horregatik, nire amarena jo dut eta berak, nire eskola garaiko une batzuk kontatu dizkit. Agian, ez ditut zehaztasun askorekin azalduko, esan dudan bezala, ez bainaiz gauza askotaz gogoratzen.

Haur Hezkuntzako egoera askotaz  ez naiz gogoratuko, baina bai gelaren egituraketaz. Nire irakaslea nor izan zen ere gogoratzen dut, oso irakasle maitekorra baitzen. Orain,  nire oroitzapen on eta txarrak azaltzen hasiko naiz.

ESKOLA GARAIKO UNE ONA

Nire amari, nire eskola garaiko une on bat esateko eskatu nionean, hauxe erantzun zidan, oso egokitzapen ona izan nuela. Urte 1 eta bederatzi hilabeterekin hasi nintzen  Ordiziako Urdaneta Ikastetxean, 2 urteko gelan, eta nahiz eta oraindik txikia izan, oso pozik joaten omen nintzen eskolara. Badakizue, betiere, abendukoa izatek, desbentaja bat du, oraindik 2 urte bete gabe eskolaratzen garela. Hala ere, oso egokitzapen ona izan nuela esan zidan amak, ez nuen negarrik egiten ama joaten zenean eta gelan bertan uzten zidanean nire beste laguntxoekin jolasean. Nire amak, beranduago etorriko zela esan eta joan egiten zen ni eskolan jolasean  utzita. Egia esan,  orain kontatutako une hau ez dut oroitzen, izan ere, oso txikia nintzen, baina pentsatzen jarrita, une polit bat gogoratu dut.

Egia esan, oroitzen dudan unerik politena eta bakarra da eta une hori nire urtebetetze egunean izan zen. Nire urtebetetze egunean beti, oso emozionaturik egoten nintzen eta egun horretan eskolara, oso pozik joan nintzen. Normalean, norbaiten urtebetetze eguna zenean, gelan ospatzeko janaria ekartzen genuen, normalean ogia txokolaterekin izaten zen eta ikasgela bertan meriendatzeko aukera izaten genuen.

 Egun hori, nire eguna zen, ni nintzen egun horretako protagonista eta lehen aipatu dudan bezala,  oso pozik joan nintzen eskolara. Ikasgelara iritsi eta denak zoriondu zidaten, pozaren pozez  nengoen. Egun horretan, ogia eta txokolatea eraman nuen eta nire lagunei banatzeko ere, boligrafoak sartzeko zorro txikiak eraman nituen. 

Denak borobil batean eseri eta ni zutik geratu nintzen, egun horretako protagonista bainintzen.  Denak ondo eseri zirenean, nik,  irakaslearen laguntzaz, txokolatezko bokadiloa banatu nien. Oso gustura jan zuten denek bokadiloa. Hori banatu ostean, beste opari bat nuen beraientzat eta banatzen hasi nintzen. Oso pozik jarri ziren nire lagunak eta ni ere, oso pozik egon nintzen ekarritako guztia banatzen.  Ekarritako guztia banatu nuenean, zorionak zuri abestia kantatu zidaten. 

 

Hau izan zen nire unerik politena eta egia esan, oso ondo pasatu nuen. 

ESKOLAKO GARAIKO UNE TXARRA

Eskola garaiko une ona kontatu eta gero, une txarra kontatzeko txanda ailegatu da. Egia esan, nahiz eta pentsatzen denbora asko jardun, ez dut  eskola garaiko une txarrik gogoratzen eta oraingoan ere, nire amari galdetu diot.

Momentu txar bat jangela garaikoa izan zen. Jangelan, 5 urterekin hasi nintzen, eta niri gustatzen ez zitzaidan janaria jartzen zutenean, oso gaizki pasatzen nuen. Gustatzen ez zitzaidan janarietako bat purea zen, eta nire amak kontatu zidan, purea jartzen zutenean, plater guztia zikintzen nuela eta horren ondorioz, ez nuela ia ezer jaten. Jangelan ere, beste gauza bat ere bazen, bazkaltzen bukatzen genuenean, basoak karro batean utzi behar genituen eta basoren bat puskatzen bazenu, mundu guztiak txalo egiten zizun.  Denei bezala, niri ere basoren bat puskatu zitzaidan, eta jangelan zeuden ikasle guztiak txalo egin zidaten, egia esan oso oso gaizki pasatu nuen momentu horretan. Niretzako, jangelako janaririk goxoena, kroketak ziren, horretaz barrik gogoratzen naiz, horiek bai jaten nituela gustura.

Beste une txar bat ere kontatu zidan eta zuei ere kontatuko dizuet.  Une hau, Lehen Hezkuntzan gertatutakoa da.  Denok, edo batzuk dakizuen bezala, jendearen aurrean hitz egitea ez zait batere gustatzen, oso urduri jartzen bainaiz eta horren ondorioz, ez nahiz behar bezala espresatzen. Orain azalduko dudan unea honetaz doa.  Lehen Hezkuntzan, lan ezberdinak egiten genituenean, eta lan hori amaitzen genuenean,  aurkezteko txanda izaten zen eta hori denek egin beharreko lana zen.  Nire aurkezteko txanda ailegatzen zenean,  eta denen aurrean jartzen nintzenean, hitz egiten hasi eta  poliki-poliki oso gaizki jartzen  hasten nintzen. Irakasleak amari esaten zion:  “ Alazne morena da eta aurkezpenetan zuria jartzen da “ nahiz eta aurkezpena oso ondo ikasita izan, oso urduri egoten nintzen. Irakasleak, nire aurpegiaren aldaketa ikusten zuenean, eta oso gaizki nengoela ikusirik, aurkezpena beste egun batean egiteko aukera ematen zidan.  Hala ere, nahiz eta oso urduri jarri, denek bezala, aurkezpena egiten nuen.  Une hauetan, oso gaizki pasatzen nuen.

Aurreko egunean ikusi nuen antzeko kasu bat ikastolan. Berari arduraduna izatea tokatzen zitzaion hiru egunetan, orduan, arduraduna zenez, zutik jarri eta beste ikasleei datu batzuk eman behar zizkion. Oso urduri jarri zela antzeman nion, denbora guztian hankak  mugitzen zituen eta urduritasunak ez zion ongi azaltzen uzten. Egoera horrekin, oso identifikatuta sentitu nintzen, niri berdina pasatzen zitzaidalako. Gelan ere, lotsati asko daudela ikusi dut, eta gehienetan oso isilik egoten dira. Holako kasuetan, oso identifikatuta sentitzen naiz, ni ere, horrela egoten bainintzen.

Oraindik ere, nahiz eta 21 urte izan, arazo berdina dut, oso urduri jartzen naizela, baina agian, egunen batean ,urduri ez jartzen lortuko dut.

Hauek izan dira nire eskola garaiko  une on eta txarrak. Orain nire hilabete bateko praktikaldian, haurren une on eta txar batzuk ikusi eta aztertzeko  aukera izango dut, eta seguru nago, batzuekin oso identifikatuta egongo naizela.

4. eguna 2011-10-28

Gaur denak oso pozik joan gara eskolara, gaur ostirala baita. Beti bezala, goizeko 9 etan txirrinak jo du eta denak gelara igo dira. Lehenengo 40 minutuetan, jolas librean aritzeko denbora izan dute. Gaur, batzuk, beste jolas berri batean haritu dira, denda bat egin dute. Irakasleak, gezurretako dirua banatu du dendan ibiltzeko. Jolas honetan, neskak aritu dira, mutilak kotxeekin ibili dira. Jolas librea egiten dutenean, oso ondo pasatzen dute. 40 minutuak pasa direnean, gela txukundu eta arduradunaren txanda zen. Arduradun berdina 3 egunetan egoten da eta orduan, gaur beste arduradun bat izendatu dute. Pixka bat kostatu zaio arduradunaren zereginak egitea, hau da, bere burua aurkeztu, zein egun den esan eta borobildu, bere urtebetetze eguna zein den esan,… hau dena egin eta gero, denak U forman jarri dira eta antzerkiaren txanda zen oraingo honetan. Hau egin baino lehen eta ipuinak eta antzerkiak kontatu aurretik, abesti bat abesten dute:

Zatoz gurekin goazen,

emaidazu muxu,

ipuin polit- polit  bat,

entzun nahi ahal duzu.

Lai lai lai lai lai lai

entzun nahi ahal duzu.

Hemen jarri dudana da abestia, eta beti abesten dute. Antzerkiarekin jarraituz, irakasleak ipuina antzezten zuen bitartean, haurrak kopiatu egiten zien, irakasleak egiten zuen guztia egiten zuten haurrek. Antzerkiarekin amaitu ostean, bakoitza bere eserlekuan eseri da eta oraingo honetan, lana egiteko garaia zen. Bakoitzari, liburuxka bat banatu die eta gaurko ariketa egiteko prest jarri dira. Lehenik eta, haur bakoitzak  bere izena liburuxkan jarri du, gero, hostoak lantzen ari garenez, irakasleak eta nik arbelean lau hosto mota marraztu ditugu eta marrazki bakoitzaren gainean dagokion izena ipini dugu. Beraien lana zera zen, arbelean zeuden hostoak beren liburuxkan kopiatzea eta dagokion izena jartzea.  Orokorrean, oso lan politak egin dituzte, oso langileak dira.  11.30 etan atsedeneko ordua zen, eta beti egiten dugun bezala, lehenengo komunera joan, gero gaileta banatu eta listo! Atsedenera joateko prest!

Arratsaldean, tenperarekin margotzeko aukera izan dute. Denak, mantala jarri eta margotzen hasi dira, hori bai, udazkenarekin loturik egon behar zuen marrazkia. Oso marrazki politak egin dituzte, egia esan, artista batzuk dira haur hauek. Denek margotu dutenean, maitane eta biok, ikasgela garbitu dugu haurrak atsedenean zeuden bitartean. Arratsalde polita izan da. 16.30 etan txirrinak jo duenean, abesti bat hasi da “Ostirala” abestia hain zuzen ere. Hemen uzten dizuet ostiraleko abestiarekin, asteburu ona izan!!!!

Lehenengo hiru egunetako sentsatzioak

Lehenengo hiru egunak pasata, hausnarketa txiki bat egiteko tarte bat hartu dut. 

Nahiz eta aurretik beste praktika batzuk egin beste ikastetxe eta adin  desberdinekoekin, 2 eta 0-1 urtekoekin, hain zuzen ere,  Jakintza ikastolara joan nintzenean oso urduri nengoen. Hemen, 5 urteko taldean nago eta ez nekien nolako taldea izango zen, nolakoak izango ziren,… eta horregatik, nahiko urduri joan nintzen.

 

Egia esan, alde handia  sumatzen dut nire lehenengo eguna eta hirugarren egunarekin. Oroitzen dut, lehenengo egunean, oso urduri nengoela eta horrek ez ziten onerako egiten, blokeatu egin bainintzen.  Gelara sartu eta ez nekien zer egin, zer esan… haurrak ere, ez nituen ezagutzen, orduan lehenengo eguna,  behaketa izan zen. Gehien bat, behatzen egon nintzen eta beraiek duten dinamika ikasten joan nintzen eta oraindik ere ikasten nabil.  Lehenengo egunean, oso gustura bueltatu nintzen etxera, oso talde eta irakasle jatorrak tokatu baitzaizkit.

Bigarren egunean, lasaiago joan nintzen eskolara. Haurrak, pixkanaka-pixkanaka ezagutzen noa eta horrek, lasaitasun puntu bat ematen zidan.  Bigarren egunean, nik ere asko ikasi nuen, hostoen inguruan hitz egin zuten, eta egia esan, ni hosto guztien izenaz ez nintzen oroitzen eta honekin, memoria pixka bat landu nuen. 

Hirugarren egunean ere, nahiko lasai joan nintzen, konfiantza hartzen bainoa, bai irakasle eta haurrekin.

Egia da esaten dutenean, ikasleengandik ere ikasten dela, beraiek beren ekarpenak egiten dituzte eta beharbada, zuri bururatzen ez zaizun gauzaren bat esaten dute eta horregatik, oso aberasgarri da haurren ekarpenak entzutea.

Hiru egun hauek pasata, esan nahiko nuke, oso gustura nagoela ikastetxean. Asko ikasten ari naiz eta irakasleak ere, ikasgelako  dinamika nolakoa den ere azaltzen dit.  Hurrengoan, berriz azalduko dizuet nire praktikaldiko sentsazioak, beste hausnarketa bat eginez.

3. eguna 2011-10-27

Gaur, hirugarren eguna izan da. Hirugarren eguna izanik, nahiko lasai joan naiz, haurrak ezagutzen bainoa.

Beti bezala, goizeko 9 etan txirrinak jo du eta denak gelara sartu dira. Ez dira denbora asko egon, izan ere, ingelerara joan behar zuten. Haurrak ingeleran zeuden bitartean, ni irakaslearekin egon naiz gauzak egiten. 9.30 etan ingelera amaitu eta gelara joan dira orduan, jolas librea egiteko aukera izan dute. Batzuk, ordenagailuan ibili dira. Ordenagailuan, ariketa eta jolas  desberdinak egin daitezke eta oso ondo pasatzen dute, beti dago baten bat ordenagailuan. Beste batzuk, marrazkiak egiten haritu dira, ekintza hori egiten, oso ondo pasatzen dute, esan beharra daukat, asko gustatzen zaiela marraztea.  Jolas librean aritu eta gero, irakasleak jasotzeko esan die sorpresa bat baitzuen beraientzat. Gela osoa txukuntzean, haur guztiak marraren gainean eseri eta irakasleak sorpresaren berri eman die. Sorpresa zera zen, psikomotrizitate gelara joatea, beraiek astearte arratsaldean izaten dute saio hau, baina asteartean jai izan zenez, gaur joateko aukera izan dute. Denak, ilera batean jarri eta psikomotrizitate gelara abiatu gara, bertan, zapatilak jarri eta lurrean eseri dira bata bestearen ondoan. Ni bitartean, irakaslearekin dorrea eraikitzen aritu naiz. Dorrea egin ostean, irakasleak zein arau dauden galdetu die eta haurrak berehala hau erantzun dute: “ ezin da minik eman eta ezin da minik hartu” hori esan eta gero, irakasleak 1,2 eta 3 esandakoan segituan altxatu eta dorrea puskatu dute. Hor hasi da haurren jolasaldia. Ez dira denbora asko egon, izan ere, gaur ez zen saio honen eguna, baina denboratxo bat egon dira. Oso gustura egon dira saio honetan, talde txikiak egiten direla aipatu nahiko nuke. Ordua iritsi denean, irakasleak jasotzeko esan eta denak jasotzen hasi dira, hala ere, bazeuden bat edo beste eskakeatu egiten zirenak. Dena txukun utzi dugunean, zapatilak jarri eta gelara joan gara. Gelan, hiru ilara eginez, lurrean eseri dira eta oraingoan arduradunaren txanda zen. Arduraduna altxatu eta lehenik eta behin, bere burua aurkeztu du. Gero, bere urtebetetze eguna zein den esan, zein egunetan gauden ere esan du,… arduradunak esan behar zuen guztia esan du. Hori egin ostean, hiztegiaren txanda zen, irakasleak definizio bat esan eta haurrak hitza asmatu behar zuten.  11.30 etan atsedenera joan baino lehen, komunera joan, gaileta banatu eta segituan jolastokira joan dira jolastera. Atzo esandako haurra, bakarrik jolasten aritu zela jolas ordu guztian, gaur beste haur batekin jolasten aritu da, baina ohartu naiz, bakarrik haur horrekin jolasten duela eta ez beste guztiekin. 12.10 ean, gelara igo gara, txamarra eta beste batzuk mantala jantzi eta bazkaltzera joan gara.

Arratsaldean berriz, txirrina jo bezain pronto, haur guztiak gelara igo dira. Gelara sartu eta lurrean eseri dira, beti bezala, hiru ilera eginez. Oraingo honetan, ipuinaren txanda zen, irakasleak ipuina kontatu die, “Artzain gezurtia”ren ipuina hain zuzen ere. Irakasleak, oso ondo antzeztu du ipuina, bere toke pertsonala eman dio eta oso ondo geratu da. Ipuina amaitzean, beren iritzi pertsonalak kontatzeko garaia zen eta haur bakoitzak, ipuinari buruzko iritziak eman ditu.  Hau guztia egin eta gero, jolas librean aritu dira. 15.30 ak aldera, gela guztia txukundu eta bideo gelara abitu gara, bertan beste taldekoekin elkartu eta hiru bideo txiki ikusi ditugu. 16.00 ak aldean, komunera joan eta gaileta banatu ostean, jolastokira joan gara, baina oraingo honetan, ikastetxe barruan aritu dira, kanpoko parkea bustita baitzegoen. 16.20 aldera, gelara igo, txamarrak jantzi, ilera bat egin eta 16.30 etan txirrinak jo duenean, denak etxera joan gara.

2. eguna 2011-10-26

Gaur bigarren eguna zenez,  nahiko lasai egon naiz, lehenengo eguneko urduritasuna alde batera utzi eta pilak kargaturik joan naiz.

Goizeko 9 etan txirrinak jo eta haur guztiak gelara sartu dira. Irakaslea eta ni bertan geunden. Aurreko egunean esan nuen bezala, Udazkena dute gai bezala eta horregatik, gaur hosto ezberdinak  ekarri behar zituzten. 9.10 etan haurrak ingelerara joan dira eta ni irakaslearekin geratu naiz haurrak ekarri dituzten hosto ezberdinak begiratzen.

Ordu-erdi  1 pasa ostean, haurrak gelara igo dira eta borobil bat eginez, lurrean eseri dira. Aurkezpeneko txanda zen eta orduan, haur bakoitzak, ekarri dituzten  hostoen izenak esan, nondik ekarri dituzten, norekin joan diren biltzera... banan- banan azaldu dute. Azalpen guztiak eman eta gero, irakasleak jolas librean aritzeko aukera eman die. 11.30 etan, gela txukundu eta gaileta banatu eta gero,  ikastetxe kanpoan dagoen parkera jaitsi  gara jolastera. Jolas orduan geundenean, gauza batez ohartu naiz, haur bat bakarrik zegoen eta atsedeneko ordu guztian bakarrik egon da. Ez du beste haurrekin jolastu. 12.10 ean gelara igo gara,  batzuk mantala jantzi eta beste batzuk, etxera joateko jertsea jarri dute.  Hori egin ostean, jangelakoek ilara bat eta etxera joan behar zirenak beste ilera bat egin dute. 12.15 etan txirrinak jo duenean,  batzuk jangelara eta besteak etxera joan dira.

Arratsaldean, 14.30 etan sartu gara eta sartu bezain pronto, lurrean eseri dira hiru lerro eginez. Arduradunaren txanda zen oraingo honetan. Arduradura altxatu eta lehenik eta behin, bere burua aurkeztu du eta ea pozik ala triste dagoen esan du, gero, bere urtebetetze eguna noiz den esan du, ondoren, ze eguraldi egiten duen eta zein egun den esan du. Amaitzeko, haur guztiak zutik jarri dira eta arduradunak denak zenbatu ditu, zenbat neska eta zenbat mutil eta denera zenbat dauden ere kontatu du. Hori egin ostean, hiztegiaren txanda zen. Gaur, gazta hitza tokatzen zen eta irakasleak gaztaren ezaugarriak esan dizkie haurrei. Ondoren, irakasleak definizio batzuk esan eta beraiek zein hitz zen asmatu behar zuten. Hiztegiaren atalarekin amaitu dugunean, jolas librean aritu dira, batzuk marrazkiak egiten, beste batzuk plastilinarekin…. Arratsaldeko 4rak aldera, gauza guztiak jaso eta komunera joan dira, gero bakoitzari bina gaileta banatu eta jolastokira joan dira jolastera. 16.15 inguru, gelara igo gara, eta txamarra hartu eta ilara bat egin dute. 16.30 etan txirrinak jo eta denak kalera irten gara.

Xango

Honek, Xango du izena eta 5-6 urtekoen maskota da. Jakintza ikastolan, urtxintxa proiektua erabiltzen dute eta honek maskota ezberdinak ditu.

1. eguna 2011-10-24

Gaur nire lehen eguna izan da Jakintza ikastolan. Hasiera batean nahiko urduri nengoen, baina denbora pasa ahala lasaitzen joan naiz.

Goizeko 9 etan, haurrak gelara sartzen joan dira eta ni bertan nengoen ze esan ez nekiela. 9 etatik 9.30 etara jolas librea egin dute, batzuk marrazkiak egin dituzte, beste batzuk, puzzlean aritu dira, beste batzuk ordenagailuan... 9.30 etan gelaren erdian jarri eta arduradunak bere eginbeharrak egin ditu: bere burua aurkeztu du, gero, ze egun den, zer nolakoa eguraldia egiten duen, gelan zenbat dauden,(zenbat neska eta zenbat mutil) eta hori guztia egin ostean, joku bat egin dugu. Denak, borobil batean jarri gara eta irakasleak baloi bat ekarri du, orduan, baloia zuenak bere izena esan behar zuen. Hori egin ostean, haur guztiak ingelerara joan dira, eta gai hau beste gela batean ematen dute. Ni bitartean, nire tutorearekin egon naiz eta eskolaren funtzionamentua pixka bat azaldu dit.  Ingelesean, 30 minutu egon dira eta gero denak gelara etorri dira, ni eta irakaslea bertan geundelarik. Denak gelara etorri direnean, irakasleak hilabete hontako gaia azaldu die; Udazkena eta honi buruzko datuak eta abar.. esaten aritu dira. 11.30 etan atsedena egin dugu, eta haurrak, ikastetxe barruan duten patioan jolasteko aukera izan dute. 12.15 etan haur guztiak jantzi eta batzuk etxera eta beste batzuk jangelara joan dira.

Arratsaldean berriz, 14.30 etan sartu gara eta goizean bezala, lehenengo ordu erdian jolas librea egin dute, gero udazkenaren  inguruan lan egin behar dutenez, irakasleak, hosto ezberdinak erakutsi dizkie.Azalpen guztiak eman eta gero, patiora atera gara, eta oraingoan kalera irten gara. 16.30 etan txirrina jo eta haur guztiak etxera joan dira.

Hau izan da nire gaurko eguna, esan beharra daukat, oso irakasle eta talde jatorra tokatu zaidala.

Aurkezpena

kaixo!!

Ni Alazne Furundarena  naiz eta Goierriko herri batean bizi naiz, hain zuzen ere, Ordizian. Orain dela 2 urte hasi nintzen Haur Hezkuntzako gradua ikasten Donostiako Irakasleen Unibertsitate eskolan. Hemendik gutxira, praktiketan hasi behar naiz, eta blog honen bitartez, nire esperientziak, bizipineak, informazioa... txertatzen joango naiz.

Esan bezala, praktiketan hasten naiz, eta hilabete oso bat egon behar dut bertan. Praktika hauek, Ordiziako Jakintza ikastolan burutuko ditut , 5 urteko haurrekin. Egia esan, ikaragarrizko gogoa dut astelehena iristeko, hor hasten baita nire praktikaldia.




Besterik gabe, agurtzen naiz.

Alazne Furundarena